বাচুনির বাপ ফুনছোনা
কেন গইজ্জুম আঁই হসুনা
মাইয়ার লাই ঘর আইস্সে দে
উফাই আছে না আরে বুদ্ধি দেছুনা।।
ফুয়ার বারি নিচিন্তাপুর মাইট্টা কুড়ার ঘর
বিদেশ ঘুরি আইস্সে ফুয়া আস্ট বছর পর
অদ্দা এইল্লা ফুয়া হন্ডে ফায়ুম
বারি ভিড়া বেইচ্ছুম না ।।
অদ্দা ফুয়ার হোনো দাবি নাই এক্কান মাত্র অউশ
হুন্ডা এক্কান দন ফরিবো একশত নাকি দশ
অদ্দা এইল্লা ফুয়া হন্ডে ফায়ুম
বারি ভিড়া বেইচ্ছুম না ।।
রঙ্গিন টেলিভিশন ফ্রিজ ফুয়ার মাঁর অউশ
এগিন নদিলে নাকি অইবো বিয়া ফস
অদ্দা এইল্লা ফুয়া হন্ডে ফায়ুম
বারি ভিড়া বেইচ্ছুম না ।।
ফুয়ার বাপর দাবি নাই মাত্র নশত বইরাত
ছল কুরা দুরুস সহ দন ফরিবো তারত
অদ্দা এইল্লা ফুয়া হন্ডে ফায়ুম
বারি ভিড়া বেইচ্ছুম না ।।
ফুয়ার দাদা দাদি লইবো বিশ সান শাল শাড়ি
নইলে নাকি আঁর মাইয়ারে ফাডাই দিবো বারি
অদ্দা এইল্লা ফুয়া হন্ডে ফায়ুম
বারি ভিড়া বেইচ্ছুম না ।।
